Uffzaichnet vom e neye Gsellschaftsbrueder von ere Ehregsellschaft zer Hääre, in der Sprooch, won är schwätzt:
Ych erwach und stand voller Vorfreud uf. E Duschi und e feine Kaffi hälfe dr Daag z’starte. Jetzt mach ych mi parat und leg mi beschti Klaidig aa. Drnoo goot‘s ab zem Lääberli und Boggbier z’Morge in dr Rhygass, es herscht scho rege Betrieb und fröhligs triibe bi sunnigem, jedoch kaltem Wätter.
E Bsuech uf dr Fähri zem no mim Fährimaafrind alles Gueti zem Geburtsdaag go winsche. Aaschliessend verfolg ych mit Frinde und Familie am Rhybord d’Talfahrt vom Wild Maa, bevor ych ihne e scheene Daag winsch.
Das isch dr Aafang in Gsellschatsdaag, ych begib mi ins Kaffi Spitz zem mit de andere Gsellschaftsbriedere dr gmainsami Teil z’starte und aa z’stosse. Dodrbi verfolge mir au gmainsam dr Tanz vo de drei Ehrezeiche vor em Spitz.
Nachdäm alli Gsellschaftsbriedere wieder ihri Mäntel und Hüet gfunde hänn, dangg dr viilfältige Farbpalette, e spannends Unterfange, stehn alli Gsellschaftsbriedere hinter dr 3E-Clique y zem gmainsame Marsch richtig Congräss-Zentrum.
Dr Tisch isch rasch gfunde, viili bekannti und au no unbekannti Gsellschaftsbriedere kemme die Neye go begriesse. Es isch e sehr frindlige, härzlige und offene Empfang, so kunnt sofort e sehr familiäri Stimmig uf und ych fühl mi scho dehaim aako.
Meischter, Gescht und Vorgsetzi marschiere y, beglaitet vo dr 3E-Clique. Sie presentiere dr Silberschatz und dr Vorsitzendi Meischter begriesst alli zem Gryffemöhli.
D’Vorspiis wird serviert und zwische de Gäng git’s Darbietige vom Chor und dr 3E-Clique, beidi Gruppierige wärbe au krätig fir neyi Sänger, Pfiffer und Tamboure.
D’Gescht wärde vorgschtellt und Toteehrig wird verläse. Au git’s allewyl gueti Tipps fir die bevorstehendi Uffnahm und wie das Ritual am beschte vorbereitet und duuregfiehrt wärde soll. Dodrbi bi ych mir nit ganz sicher wär närvöser isch, die neye wo uf d’Biihni mien oder die wo im Saal sitze und das Ritual beobachte.
Grossartig isch natiirlg dr Tanz vo de drei Ehrezeiche im Saal vor de jewiilige Maischter. Wyter hänn mir em Vorsitzende Häre-Maischter, Rene Wegmüller, si sehr gueti, sozialkritischi, emotionali und sehr träffendi Red zur aktuelle Lag in Glaibasel deerfe gniesse. Au d’Red vo dr Ständerootspresidäntin Frau Dr. Eva Herzog het viilne uss em Härz gschproche. Sie het, stehts politisch korräkt, jedoch allewyl träffend aagschproche, dass meh Basel noch Bärn brocht wärde sott und au s’Thema Fraue in de Ehregsellschafte het Sie sehr scheen aagschproche.
Und jetzt isch dr Momänt do, wo doch scho alli druff gwartet hän, s’git die letschte Aawiisige vom Vorsitzende Häre-Statthalter Rolf Jeger zem Ufnahmeritual vor em Saal, e jede ney Gsellschaftsbrueder reit sich alphabetisch hinter sim Gsellschaftsbanner uf und denn laufe mir begleitet vo drei Tamboure durch dr Saal und uf d’Biihni.
Deert wird e jede perseenlig ufgruefe und, solang no Stimm do isch, vom Vorsitzende Häre-Statthalter vorgschtellt. E jede bikunnt denn dr gfillti Meischterbächer vom Schriiber yberreicht und darf dä zem Drummelwirbel ussdringge, durch aaschliessends umdreie wird em Saal zeigt, dass är läär isch. Das hänn alli neye Gsellschaftsbrieder ohni nassi Fiess bewältigt.
Dr Gryffebrueder Christian Lienhard het aaschliessend e sehr scheeni und amüsanti Verdankig in Värsform suverän vortreit und somit dä Akt würdevoll abgschlosse. Bim Abgang vo dr Biihni het e jede sim Maischter mit Handschlag und Umarmig fir d’Uffnahm dankt und d’Ehr erwiese. Im Saal sin viili
Willkommensgriess und Gratulatione yberbrocht worde.
Druf abe hän mir d’Red vom Herr Prof.Dr. Manuel Battegay deerfe gniesse. Au die isch sehr guet, kurzwyylig und amüsant vortreit gsi. Dr musikalischi Abschluss het dr Chor, mit gsangskräftiger Unterstitzig vom Saal und d’3E-Clique uf d’Biini brocht.
Noch em emotionale Schlusswort vom Vorsitzende Häre-Statthalter Rolf Jeger, isch s’Gryffemöhli 2024 ussklunge. E jede het dr Räscht vom Obe und dr Nacht noch sim Gusto verbrocht, ych ha mi no vo dr Freud und de Lyt lo triibe und ha no viili Gsellschaftsbrieder in de glaine Beizli im mindere Basel
aatroffe und gspührt, do isch s’Lääbe no lääbenswärt.
Wo ich denn mied, voller neye Ydrück aber definitiv glückligg, deheim ins Bett gläge bi, han ych gwüsst, es isch halt scho scheen z’Basel, uf dr rächte Syte vom Rhy, do bi ych deheim und will ych sy.
Hochgeachtete Herr Vorsitzende Meister
Hochgeachteti Herre Meister und Alt-Meister
Sehr verehrti Herre Statthalter und Alt-Statthalter
Verehrti Herre Vorgsetzti und Alt-Vorgsetzti
Und vorallem liebi Gsellschaftsbrieder vo dä Drei Ehregsellschafte vom Glaibasel
Ych dangg Eych allne fir mi Uffnahm in e neyi Familie und die viile tolle und emotionale Errinnerige, wo mi no lang begleite wärde. Natiirlig frey ych mi au uf alles, was no kunnt. Viili neyi Wurzle sin entstande und wärde sich no wyter dur s’Glaibasel grabe, stärke und verankere.
Hochachtigsvolli Griess
Eyre Häre-Gsellschaftsbrueder
Philipp Eckerlin
Das Eingangsbild ist als Rückseite der Menü-Karte zum Gryffemähli 2024 von der Basler Grafikerin Patrizia Stalder geschaffen worden.