Wie erlebt ein neu aufgenommenes Mitglied der Drei Ehrengesellschaften Kleinbasels sein erstes Gryffemähli? Welche Erinnerungen und Erfahrungen bleiben?
Stephan Kohler, am Gryffemähli vom 27. Januar 2025 neu in die Ehrengesellschaft zur Hären aufgenommen, beschreibt hier in seinen ur-eigenen Worten, wie er diesen Tag erlebt hat - und was ihm in Erinnerung bleibt.
Bisch nervös?
Y wett do e klaine Yyblig geh iiber d Uffnahm ind 3E vo mir perseenlig. Es sell kai Ablaufvorlääsig si mit de Person XY wo das gseit het etc. sondern eifach Yydrügg und Gfiil iibermittle.
Aagfange het dä Daag fiir mi am 7ni am Morge bi mir im Gschäft, da y Gastronom bi und grad zmitts im Kueche vom Glaibasel baize, händ mir ab de 8te offe, scho elai will mir dr Gryffebogg uuselend. 😉
Y gang jewiils am Morge go schaffe am Vogel Gryff, wills halt doch e sehr lange Daag isch und y nit wett das mi Stv. an däm Daag no länger muess schaffe, als si eh scho derf.
Item, scho am 8ti am Morge isches jedefalls loosgange mit Umarmige und Gratulatione vo Lyt wo wirglich au Freyd händ, dassi zu de 3 E kum. Y ha mi den mängisch gfroggt, wasi den genau glaischtet ha, aber hami nadiirlig trotzdäm gfreyt.
Au dr Satz „bisch nervös“ oder „bisch bereit“ sind e baar mol gfalle…
Ja hä? Fiir was muessi jetzt bereit si? Wiso genau selli jetzt nervös si?
Y hamer denn kai grossi Gedangge gmacht und ha munter mini Gescht widerempfange und bedient.
Es isch den ratz fatz gange und es isch halb 11 gsi, e baar vo mini zuekünftige Gsellschaftsbrieder sind no bi mir ghoggt und scho ischs wider loos gange, „jä bisch nonig umzooge“, „wettsch nit langsam vorwärts mache“, „bisch nonig nervös“…
"Jungs gmiedlich" isch mi Antwort gsi und e so hanis den au gno.
Am viertel ab 11ii bini den im Merian-Saal gstande, frisch gschniiglet und gwunderig was dä Daag jetzt bringt. Mis erschte Bierli in dr Hand und die erschte Händ druggt. Herrlig.
S erschte mol uff dr Terasse womer grad unseri drey Ehrezeiche gseh händ vorne usse undedra danse, super Sach und grad woni wett iinego, „sag mol bisch nit nervös?“. Jetzt hainomol, isch das iischtudiert? Gits im Programm e Punggt wo stoot dasde muesch die neye frooge ebbsi nervös sind?
Viertel vor 12ii, me macht sich langsam baraad zum iistoo um hindr dr 3E Clique zur Muba zlaufe.
Mi Jagge, mi Hued, check. Bruchi sunscht no ebbis… welle Platz hani aigedlig und wo isch mi „Byyljee“ midem Paltisguedschiin… ohoh… Bruchi dä? Isch dä wichtig? Hani dä wiirgglig vergässe? Binii doch nervös?
Grad mim Mädel aaglyte Dehaim, zarti 14 und in dr Pupertät… „Y find dä nit wo du seisch, dä isch niene do, kai Aanig wo dä isch… wart doch, do ischer doch. Joo ok denn kummi dä go bringe, wo aane muessi, wie erkenni di…
Y ka saage es het denn klappt und sie hetmeren den grad bim Yygang kenne geh.
Y danggdr duusig Myysli.
Also mir sind immer no bim yystoo und wider e umarme vo allne zämme und e schenni Stimmig im Allgemeine.
Denn goots loos, y bi grad hindr de Vorgsetzte gloffe und es isch scho beiidruggend wievyyl Lyt däm Schauspiil zuegluegt händ. Die ganz Gryffegass isch voller Lyt gsi au iiber dr Claraplatz. Nadiirlig obligat e Natel in dr Hand am filme. Es git Byyfall und Verneigige. Do wärde Hyet glüpft und griesst, eifach scheen. D Lyt händ allso doch nit so Angscht vor de Männer in de dunggle Schaale mit de Hyet.
Es git ebbe scho e tolls Bild ab, wenn 3E Clique mit de Faane und hunderti in dr Biggse hindedra d Clarastrooss durufflaufe.
Bim Yygang zur Halle isch den d Clique Spalier gstande womer iinegloffe sind. Scho rächt beiidruggend, nadiirlig hani au mi Hued glupft und iine dEhr erwiise…. Me gheert jo langsam au derzue.
Dinne, Jagge abgee und nadiirlig wider umarme und Händdrugge. "Bisch nervös?" scho wider so eine, "nai nai, alles gued".
Vor dr Halle hän mir Neye den no Zeedel verteilt und den gots an dr Disch.
Aawärterdisch wenn iinekunsch grad rächts. Jäwoll dä nämemer, aaneghoggt und e weneli das Getummel beobachtet. Do wird greedet und umarmt und begriesst und es isch eifach härzligg.
Au an unserem Tisch kemme teils Wildfremdi und begriesse di und frooge nadiirlig ebb de nervös bisch… Y glaub s einzige Zyyl isch, dasde nervös wirsch, dangge…
Zägg, stend e baar Gin Tonics uffem Tisch, dr eint vo uns het scho e guedi Usswaal ka vo Gin Tonic, Whisky Cola, Rootwyy und Wyyse. Aber immer mit dr Aawyysig "suffed nit z fill biser uff dr Biini gsi sind". Äh jo, dangge fiir dä Hiwyys…
Dr IImarsch vo de drey Ehrezeiche isch ganz e tolli Sach gsi, d Lyt sind uff dr Büüni gstand und rundumme und händ d Dänz me als nur e weeneli gnosse. Bsunders wills vom Wildmaa dr Letscht gsi isch und dä no e baar äxtraa Zuegoobe gee het. Was fiire Stimmig.
E baar guedi Reede spööter und e baar Gäng und Geträngg drnoch isch den dr Zytpunggt ko, womer uns langsam bereit händ miesse mache zum uff d Biini zgoo. "No 5 Minute " hani grad no ghert, wo e Gsellschaftsbrueder mideme volle Tablett mit Bier stolberet und eim vo uns hindeaabe leert. Rugge, Hoose alles nass… Y gibs zue es hetmi fascht verbloose vo lache, nadiirlig hedemer sau laid do, aber zum zueluegge simmer grad bi "Dinner for One" gsi. So jetzt abbutze, troggne, bürschte und den iistoo.
Hinder unsere Faane iigstande no s letschtmol "bisch nervös" iiber sich miese lo zgo und den ischs loos gange.
Dr Saal isch gstande und dFaane sind gschwänggt worde d Briedere händ applaudiert und me isch uff d Biini beglaidet worde. Jeede Einzelne isch midere glaine Vorgschicht nach vorne bätte worde und het den dr Bächer mit Wyyse gfillt in d Hand beko.
E so e scheene Momänd, wennde voorgstellt wirsch dä uuralti Bächer in dr Hand hesch und dr Wiirbel vo de Drummle aafoot. Da ich bi de Hääre bi hani dr glainscht Bächer gha und ha de andere no zueproschtet bis dr Wirbel aagfange het. Ha jo welle heflig si und nit zerscht aafo 😉
Y has den scho ghert im Saal "me mergt daser Baizer isch, so schnäll wie dä das drungge het", dangge fiir s Voruurteil… mir sind den nit alli so… 😊
E grossartigs Gfiil, jä jetzt gheeri ändlig au derzue.
Nach dr Reed vo eim vo uns als Bedanggig simmer den vo dr Biini wider aabe und es sind duuuuusigi vo Mensche ko wo sich gfreyt händ und eim umarmt händ und eim s Gfiil geh händ, dasmer derzue gheert und dasmer jetz e Teil isch vo ebbis Scheenem und Groosem.
Y kennt jetzt no lang schriibe, was am Gryffemähli no gloffe isch und welli Persone iiglaade gsi sind und wär alles e Reed ghalte het etc. Y dängg aber, dass wo mir bliibe wird isch, das y ha derfe e tolle Daag erlääbe und dases beiidruggt, wie dr Vogel Gryff in dr Bevelggerig verwaggse isch. Me isch derbi, me gheert drzue. D Lyt händ dr Plausch wemmer so e alti Dradizioon widerläbt und es sind erligi und scheeni Gratulatione gsi und NAI y bi nit nervös, dangge.
Eure Härebrueder
Stephan Kohler
Einleitungsbild: Tanz im Café Spitz; Die Drei Ehrenzeichen Wild Maa, Leu und Vogel Gryff am Gryffemähli. Ausschnitt aus einem Öl-Gemälde von Rudolf Weiss, um 1885, im Besitz der Drei Ehrengesellschaften.